1,518 కేజీల వెండి ఆభరణాలు, వస్తువులు అయోధ్య ట్రస్టు కోశాధికారి గోవింద్ గిరి వెల్లడి అయోధ్య: ఉత్తర్ ప్రదేశ్లోని అయోధ్యలో ఉన్న రామ మందిరానికి 32.259 కేజీల బంగారం, 1,518.925 కేజీల వెండి ఆభరణాలు, వస్తువులు ఉన్నాయని శ్రీరామ జన్మభూమి తీర్థ్ క్షేత్ర ట్రస్టు వెల్లడించింది. వీటితోపాటు 2,926 ఇతర విలువైన వస్తువులూ భద్రంగా ఉన్నాయని తెలిపింది. మరోవైపు ట్రస్టు మాజీ ప్రధాన కార్యదర్శి చంపత్ రాయ్, మాజీ ట్రస్టీ అనిల్ మిశ్ర ఇక నుంచీ సభ్యులుగానూ కొనసాగబోరని స్పష్టం చేసింది. ప్రత్యేక ఆహ్వానితుడు గోపాల్ రావును తొలగించామని పేర్కొంది. మంగళవారం ట్రస్టు కోశాధికారి గోవింద్ దేవ్ గిరి ఈ వివరాలను వెల్లడించారు. విరాళాల చోరీ కేసులో తనపై వచ్చిన ఆరోపణలను చంపత్ రాయ్ తీవ్రంగా ఖండించారు. సిట్ తుది నివేదిక వచ్చేవరకూ తాను మౌనవ్రతం పాటించనున్నట్లు వెల్లడించారు. మంగళవారం ఆయన స్వదస్తూరీతో హిందీలో భక్తులకు బహిరంగలేఖ రాశారు. ‘6వ తేదీన జరిగిన ట్రస్టు సమావేశంలో సిట్ ప్రాథమిక నివేదికను ప్రవేశపెట్టారు. ఆ నివేదిక ప్రస్తుతం అందరికీ అందుబాటులో ఉంది. తుది నివేదిక వచ్చాక పూర్తి స్థాయిలో స్పందిస్తా. వరుస ఘటనలను వివరిస్తా’ అని లేఖలో రాయ్ తెలిపారు. నివేదిక రహస్యమైనా ట్రస్టు సమావేశంలో లీక్ కావడం గమనార్హమని వ్యాఖ్యానించారు. ట్రస్టువద్ద ప్రస్తుతం 30 కేజీలకుపైగా బంగారు, 1,518 కేజీల వెండి ఆభరణాలు, వస్తువులు ఉన్నాయి. బంగారంతో రూపొందించిన రామచరిత మానస్, డైమండ్ నెక్లెస్లను సోమవారమే కోశాధికారి మీడియాకు చూపించారు. వెండితో చేసిన చరణ్ పాదుకలనూ ప్రదర్శించారు. సోమవారం రాజీనామా చేసినప్పటి నుంచి చంపత్ రాయ్, అనిల్ మిశ్ర సభ్యులుగానూ లేరని గోవింద్ గిరి తెలిపారు. మరోవైపు తాత్కాలిక ప్రధాన కార్యదర్శిగా నియమితులైన కృష్ణ మోహన్ను శాశ్వత ప్రధాన కార్యదర్శిగా నియమించే అంశంపై ఈ నెల 22వ తేదీన జరిగే ట్రస్టు సమావేశంలో నిర్ణయం తీసుకుంటామని వెల్లడించారు. చంపత్ రాయ్, అనిల్ మిశ్ర రాజీనామా