ఆంధ్రప్రదేశ్లోని గుంటూరు జిల్లా మంగళగిరి రైల్వే స్టేషన్ అత్యాధునిక హంగులతో ప్రయాణికులకు అందుబాటులోకి రానుంది. పునరుద్ధరించిన ఈ స్టేషన్ను ప్రధానమంత్రి నరేంద్ర మోదీ ఈ నెల 17న వర్చువల్ విధానంలో ప్రారంభించనున్నారు. కేంద్ర ప్రభుత్వ 'అమృత్ భారత్ స్టేషన్ పథకం' (ABSS) కింద సుమారు రూ.12.56 కోట్ల వ్యయంతో ఈ స్టేషన్ను సర్వాంగ సుందరంగా తీర్చిదిద్దారు.ఈ ఆధునీకరణ పనుల్లో భాగంగా పాత స్టేషన్ భవనాన్ని పునరుద్ధరించడంతో పాటు, నూతనంగా రెండో ప్రవేశ మార్గాన్ని నిర్మించారు. ఇందులో అత్యాధునిక బుకింగ్ కార్యాలయం, వెయిటింగ్ హాల్స్, వీఐపీ లాంజ్ వంటి సదుపాయాలు కల్పించారు. స్టేషన్ ముఖద్వారం, విశాలమైన ప్రవేశ మార్గం, ప్లాట్ఫారమ్ సర్ఫేసింగ్, ఆధునిక మరుగుదొడ్లు, సౌకర్యవంతమైన సీటింగ్, స్పష్టమైన సూచికలు (సైనేజీలు), ఆకర్షణీయమైన ల్యాండ్స్కేపింగ్తో స్టేషన్ రూపురేఖలను పూర్తిగా మార్చేశారు.దివ్యాంగుల సౌకర్యార్థం రెండు లిఫ్టులు, ర్యాంపులు, టాక్టైల్ పాత్వేలు, ప్రత్యేక మరుగుదొడ్లను ఏర్పాటు చేశారు. ప్లాట్ఫారమ్ 1, 4లపై నూతనంగా షెల్టర్లను నిర్మించారు. వీటితో పాటు పార్కింగ్ ప్రాంతం, పాదచారుల మార్గాలు, వీధి దీపాలు వంటి మౌలిక వసతులను మెరుగుపరిచారు. స్థానిక సంస్కృతిని ప్రతిబింబించేలా అద్భుతమైన కళాకృతులతో స్టేషన్ ప్రాంగణాన్ని అలంకరించారు.రాజధాని అమరావతి ప్రాంతానికి నేరుగా సేవలందించే NSG-4 కేటగిరీ స్టేషన్గా మంగళగిరి ఎంతో కీలకమైనదని రైల్వే అధికారులు తెలిపారు. ఈ ఆధునీకరణ ద్వారా ప్రయాణికులకు మెరుగైన సౌకర్యాలు అందడమే కాకుండా, రైల్వే కార్యకలాపాల సామర్థ్యం కూడా గణనీయంగా పెరుగుతుందని వారు పేర్కొన్నారు