సమయంలో విద్యా రంగంలో అనేక సంస్కరణలు తీసుకొచ్చామని లోకేష్ తెలిపారు. విద్యార్థులకు స్ఫూర్తినిచ్చేలా చాగంటి కోటేశ్వరరావు వంటి ప్రముఖులను నియమించామని చెప్పారు. “అమ్మకు చెప్పలేని పని చేయకండి” అనే చాగంటి కోటేశ్వరరావు మాటలు తనను ఎంతో ప్రభావితం చేశాయని పేర్కొన్నారు. విద్యార్థులు మంచి విలువలను అలవర్చుకోవాలని, ముఖ్యంగా మహిళలను గౌరవిస్తూ వారికి భరోసా కల్పించే విధంగా సమాజం ముందుకు సాగాలని సూచించారు.
ఉద్యోగాల కల్పనపై ప్రత్యేక దృష్టి రాష్ట్రంలో ఉద్యోగాల కల్పనకు ప్రభుత్వం అత్యంత ప్రాధాన్యత ఇస్తోందని నారా లోకేష్ తెలిపారు. అనేక ఖాళీలను భర్తీ చేసేలా ప్రభుత్వం ముందుకు సాగుతోందన్నారు. మెగా డీఎస్సీ ద్వారా ఉద్యోగాలు కల్పించామని, పోలీసు శాఖలో ఖాళీలను కూడా భర్తీ చేశామని చెప్పారు. రాష్ట్రంలోని యువతకు ఉపాధి అవకాశాలు పెంచడమే ప్రభుత్వ ప్రధాన లక్ష్యాల్లో ఒకటని స్పష్టం చేశారు. రాష్ట్రంలో 20 లక్షల మందికి ఉద్యోగాలు కల్పించడమే తమ లక్ష్యమని నారా లోకేష్ ప్రకటించారు. తాను గూగుల్ సంస్థను రాష్ట్రానికి తీసుకొచ్చిన సమయంలో ఎంతో ఆనందించానని చెప్పారు. అయితే ముఖ్యమంత్రి చంద్రబాబు నాయుడు తనను అభినందిస్తారని భావిస్తే.. మరింత పెద్ద లక్ష్యాన్ని నిర్దేశించారని తెలిపారు. రాష్ట్ర యువత ఉద్యోగాల కోసం ఇతర రాష్ట్రాలకు వెళ్లాల్సిన పరిస్థితి లేకుండా.. మన అమరావతి, మన విశాఖపట్నం, మన కర్నూలులోనే ఉద్యోగాలు చేసే అవకాశాలు కల్పించాలన్నదే తమ లక్ష్యమన్నారు.
అమరావతి శాశ్వత రాజధాని ఆంధ్రప్రదేశ్కు అమరావతిని శాశ్వత రాజధానిగా ప్రకటించామని నారా లోకేష్ తెలిపారు. రాజధాని అభివృద్ధితో పాటు రాష్ట్రంలోని అన్ని ప్రాంతాలను సమతుల్యంగా అభివృద్ధి చేసేందుకు ప్రభుత్వం కృషి చేస్తోందన్నారు. పోలవరం ప్రాజెక్టును పూర్తి చేసే దిశగా పనులు కొనసాగుతున్నాయని, విశాఖ స్టీల్ ప్లాంట్ను కాపాడామని పేర్కొన్నారు. రాష్ట్రానికి కీలకమైన మౌలిక వసతులు, పరిశ్రమలు, సాగునీటి ప్రాజెక్టులను అభివృద్ధి చేయడం ద్వారా భవిష్యత్ ఆర్థిక ప్రగతికి బాటలు వేస్తున్నామని చెప్పారు.
రాష్ట్ర విభజనతో ఎదురైన ఇబ్బందులు పొట్టి శ్రీరాములు చేసిన త్యాగాల ఫలితంగా ఆంధ్రప్రదేశ్ ఏర్పడిందని లోకేష్ గుర్తుచేశారు. ఉమ్మడి రాష్ట్రంగా ఉన్న సమయంలో హైదరాబాద్ను అందరం కలిసి అభివృద్ధి చేశామని అన్నారు. అయితే 2014లో రాష్ట్ర విభజన అశాస్త్రీయంగా జరిగిందని, ఆ సమయంలో ఆంధ్రప్రదేశ్ను అనేక ఇబ్బందుల్లోకి నెట్టివేశారని వ్యాఖ్యానించారు. రాష్ట్ర విభజన తర్వాత ఎక్కడ ఉండాలో, భవిష్యత్తు ఎలా ఉంటుందో తెలియని పరిస్థితి ఏర్పడిందన్నారు.
చంద్రబాబు ఒక్కరే ఆశాకిరణం ఆ సమయంలో ముఖ్యమంత్రి చంద్రబాబు నాయుడు మాత్రమే తమకు ఆశాకిరణంగా నిలిచారని నారా లోకేష్ అన్నారు. 2014-2019 మధ్య ఆంధ్రప్రదేశ్ అభివృద్ధి కోసం చంద్రబాబు ఎంతో తపనపడ్డారని తెలిపారు. 2019 తర్వాత వచ్చిన ప్రభుత్వం రాష్ట్రాన్ని నాశనం చేసిందని ఆరోపించిన లోకేష్.. 2024 తర్వాత మళ్లీ ముఖ్యమంత్రిగా చంద్రబాబు రాష్ట్ర అభివృద్ధిని ముందుకు తీసుకెళ్తున్నారని అన్నారు. ఏడు పదులు దాటినా చంద్రబాబు కుర్రాడిలా పరుగులు పెడుతూ పనిచేస్తున్నారని ప్రశంసించారు. తాము కూడా ఆయనతో సమానంగా పనిచేయలేకపోతున్నామని వ్యాఖ్యానించారు.
దేశభక్తితో పాటు రాష్ట్ర భక్తి కూడా ఉండాలి ప్రతి ఒక్కరిలో దేశభక్తితో పాటు రాష్ట్ర భక్తి కూడా ఉండాలని నారా లోకేష్ పిలుపునిచ్చారు. సింగపూర్ చిన్న దేశమైనప్పటికీ స్వాతంత్ర్యం సాధించిన తర్వాత అద్భుతమైన అభివృద్ధి సాధించిందని ఉదాహరణగా చెప్పారు. ప్రపంచంలో ఆర్థికంగా కీలక స్థానంలో నిలిచిందన్నారు. భారతదేశం కూడా ఆర్థికంగా వేగంగా అభివృద్ధి చెందుతోందని, అదే స్థాయిలో ఆంధ్రప్రదేశ్ కూడా అభివృద్ధి చెందాల్సిన అవసరం ఉందన్నారు. ఆంధ్రప్రదేశ్ యువత ఉద్యోగాల కోసం ఇతర రాష్ట్రాలకు వెళ్లాల్సిన అవసరం లేకుండా రాష్ట్రంలోనే ఉపాధి అవకాశాలు కల్పించాలన్నది ప్రభుత్వ లక్ష్యమని లోకేష్ తెలిపారు. “మన అమరావతి.. మన విశాఖపట్నం.. మన కర్నూలులోనే ఉద్యోగాలు చేయాలి” అనే లక్ష్యంతో పరిశ్రమలు, పెట్టుబడులు, ఐటీ రంగం, ఇతర ఉపాధి అవకాశాలను రాష్ట్రానికి తీసుకురావాలని ప్రభుత్వం ప్రయత్నిస్తోందన్నారు.
2047 నాటికి వికసిత ఆంధ్రప్రదేశ్ 2047 నాటికి వికసిత ఆంధ్రప్రదేశ్ను సాధించేందుకు ప్రతి ఒక్కరూ కసితో పనిచేయాలని నారా లోకేష్ పిలుపునిచ్చారు. స్వర్ణాంధ్ర లక్ష్యాలకు అనుగుణంగా రాష్ట్రాన్ని అన్ని రంగాల్లో ముందుకు తీసుకెళ్లాల్సిన బాధ్యత ప్రతి ఒక్కరిపైనా ఉందన్నారు. రాష్ట్రం అభివృద్ధి చెందితేనే ప్రజల జీవన ప్రమాణాలు మెరుగుపడతాయని, యువతకు ఉద్యోగాలు లభిస్తాయని, పరిశ్రమలు వస్తాయని తెలిపారు. పక్క రాష్ట్రాల ప్రజలు సైతం అసూయపడేలా ఆంధ్రప్రదేశ్ను అభివృద్ధి చేయాలన్నారు. ప్రజల కోసం పనిచేసే ప్రభుత్వానికి ప్రజలు అండగా నిలవాలని నారా లోకేష్ కోరారు. ప్రభుత్వం, ప్రజలు, యువత కలిసి పనిచేస్తే ఆంధ్రప్రదేశ్ను దేశంలోనే అత్యుత్తమ రాష్ట్రంగా తీర్చిదిద్దగలమన్నారు. దేశభక్తి, రాష్ట్రభక్తి, అభివృద్ధి, ఉద్యోగాల కల్పన అనే లక్ష్యాలతో 2047 నాటికి వికసిత ఆంధ్రప్రదేశ్ను నిర్మించడమే తమ ముందున్న ప్రధాన లక్ష్యమని ఆయన స్పష్టం చేశారు.
