ఇంటర్నెట్ డెస్క్: అఫ్గానిస్థాన్‌తో జరిగిన తొలి టీ20లో వైభవ్ సూర్యవంశీని తుది జట్టులోకి తీసుకోకపోవడంపై భారత మాజీ క్రికెటర్‌ క్రిస్ శ్రీకాంత్ (Kris Srikkanth) టీమ్‌ఇండియా మేనేజ్‌మెంట్‌పై మండిపడ్డాడు. అంతేకాకుండా ఈ ఏడాది టీ20 ప్రపంచ కప్ సాధించడంలో కీలకపాత్ర పోషించిన సంజు శాంసన్‌ (sanju samson) పట్ల యాజమాన్యం వ్యవహరిస్తోన్న తీరును కూడా ప్రశ్నించాడు. ఇటీవల జింబాబ్వేతో టీ20 సిరీస్‌లో ప్లేయర్ ఆఫ్‌ ది సిరీస్‌గా నిలిచిన వైభవ్‌ను కాదని.. అఫ్గాన్‌తో తొలి టీ20లో సంజుకు అవకాశమిచ్చారు. అతను కేవలం 10 పరుగులే చేసి వెనుదిరిగాడు. ‘‘అఫ్గాన్‌తో తొలి టీ20లో వైభవ్ సూర్యవంశీ ( Vaibhav Sooryavanshi ) ఆడలేదు. దీంతో మేం మ్యాచ్‌ చూడటం ఆపేసి.. సినిమా చూడటం మొదలుపెట్టాం. సూర్యవంశీ ఎందుకు ఆడటం లేదని నా భార్య కూడా ఆశ్చర్యపోయింది. గత మ్యాచ్‌లో ప్లేయర్ ఆఫ్ ది మ్యాచ్‌గా నిలిచిన వ్యక్తిని ఇప్పుడు ఎందుకు పక్కన పెట్టారని ప్రశ్నించింది. టీమ్‌మేనేజ్‌మెంట్ ( Team India ) సూర్యవంశీ పట్ల సరిగ్గా వ్యవహరించడం లేదు. తర్వాత మ్యాచ్‌లో సూర్యవంశీ ఆడి.. పరుగులు చేయకపోతే తనను జట్టు నుంచి తొలగిస్తారేమోనని ఆందోళన చెందుతాడు. మీరు తప్పుడు సంకేతాలు పంపుతున్నారు. ఆటగాళ్లందరి మనసుల్లో సందేహాలు రేకెత్తిస్తున్నారు. సూర్యవంశీ దులీప్ ట్రోఫీ, టీ20లు, ఇండియా-ఎ, ఐపీఎల్ వంటి అన్ని స్థాయుల్లోనూ పరుగులు సాధించాడు. మీరు అతడిని ప్రోత్సహించాలి’’ అని క్రిస్ పేర్కొన్నాడు. శాంసన్ ( Sanju Samson ) విషయంలో జట్టు యాజమాన్యం తీసుకున్న నిర్ణయాలను కూడా శ్రీకాంత్ విమర్శించాడు. ‘‘టీమ్ మేనేజ్‌మెంట్ సంజు శాంసన్‌తో ఆడుకుంటోంది. అతడిని చూస్తే జాలేస్తోంది. వైభవ్‌ను ఆడించాలని అతడిని తప్పించకండి. శాంసన్‌కు ఎక్కువ అవకాశాలు ఇవ్వండి. రాణించకపోతే అప్పుడు తప్పించండి. వైభవ్‌ వరుసగా కొన్ని మ్యాచ్‌లు ఆడేలా చూడండి. వీరిద్దరిలో ఎవరినీ స్థిరంగా తుది జట్టులో ఉంచకపోవడం భారత్ చేస్తోన్న పొరపాటు. ఇది ఏ ఆటగాడికైనా ఇబ్బందికరమే’’ అని క్రిస్ శ్రీకాంత్ వివరించాడు. .నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.