హిందూ సంప్రదాయం ప్రకారం తనకు అంత్యక్రియలు నిర్వహించి, అస్థికలను భారత్లోని పవిత్ర నదిలో నిమజ్జనం చేయాలన్న భర్త చివరి కోరికను నెరవేర్చడానికి ఒక జపాన్ మహిళ వేల కిలోమీటర్లు ప్రయాణించింది. ఉత్తరాఖండ్లోని బాఘేశ్వర్కు చేరుకున్న ఆమె.. తన భర్త అస్థికలను పవిత్ర సరయూ నదిలో నిమజ్జనం చేసి, ఆయన కోరికను ఘనంగా నెరవేర్చింది. జపాన్కు చెందిన మియాకో అనే మహిళ, భారతీయ సంస్కృతి, ఆధ్యాత్మిక సంప్రదాయాలపై గాఢమైన ఆసక్తిని పెంచుకున్న అమెరికాలో జన్మించిన తన భర్త రాబర్ట్ అవశేషాలను తీసుకుని బాఘేశ్వర్కు చేరుకున్నారు.తన జీవిత కాలంలో రాబర్ట్.. తన అంత్యక్రియలు మరియు అస్థికల నిమజ్జనం (హిందూ సంప్రదాయం ప్రకారం దహన సంస్కారాల అవశేషాలను పవిత్ర నదిలో కలపడం) ఉత్తరాఖండ్లోని బాఘేశ్వర్ ఉన్న బాగ్నాథ్ ధామ్లో జరగాలని కోరుకున్నారు. స్థానిక గైడ్లు, పురోహితుల సహాయంతో మియాకో బాఘేశ్వర్లోని సరయూ, గోమతి నదుల సంగమ ప్రాంతానికి చేరుకున్నారు. రాబర్ట్ ఆత్మ శాంతి కోసం స్థానిక పూజారుల సహాయంతో నదీతీరంలో సాంప్రదాయ వైదిక పూజా కార్యక్రమాలు నిర్వహించారు. అనంతరం ఆయన అస్థికలను సరయూ నదిలో నిమజ్జనం చేశారు.భారతీయ సంస్కృతి, హిందూ సంప్రదాయాలు, ఆధ్యాత్మికతపై రాబర్ట్కు ఎంతో గౌరవం ఉందని, తన చివరి కోరికను ఆయన భార్యకు స్పష్టంగా తెలియజేశారని మియాకోకు సహకరించిన స్థానిక గైడ్ తెలిపారు. భర్త ఎంతగానో గౌరవించే సంప్రదాయాల ప్రకారం ఆయన చివరి కోరిక నెరవేరేలా చూడటానికే మియాకో జపాన్ నుంచి బాఘేశ్వర్కు వచ్చినట్లు వెల్లడించారు. ఘాట్ల వద్ద ఉన్న స్థానికులు, తీర్థయాత్రలకు వచ్చిన భక్తులు ఈ కార్యక్రమాన్ని ఆసక్తిగా తిలకించారు. భర్త చివరి కోరికను గౌరవించడానికి జపాన్ నుంచి ఉత్తరాఖండ్కు వచ్చిన మియాకో నిర్ణయాన్ని పలువురు ప్రశంసించారు.శివునికి అంకితం చేసిన పురాతన బాఘేశ్వర్లోని ముఖ్యమైన ఆధ్యాత్మిక కేంద్రాలలో ఒకటైన బాగ్నాథ్ ఆలయం సమీపంలో ఈ కార్యక్రమం జరిగింది. సరయూ, గోమతి నదుల సంగమ స్థానంలో ఉన్న బాఘేశ్వర్, ఉత్తరాఖండ్లో ఒక ముఖ్యమైన పుణ్యక్షేత్రంగా ఉంది. ఈ పట్టణం పూర్వీకుల ఆచారాలు, పవిత్ర జలాల్లో అస్థికల నిమజ్జనానికి కూడా ప్రసిద్ధి చెందింది.ఇదిలా ఉండగా, 2005లో రాబర్ట్, మియాకోలు ఓ యోగా శిక్షలో కలుసుకున్నారు. ఆ పరిచయం స్నేహానికి దారితీసి, ప్రేమగా మారింది. ఇరువురూ కలిసి 2007లో తొలిసారి భాగేశ్వర్ను సందర్శించారు. సరయూ, గోమతి నదుల సంగమ ప్రదేశం ఉన్న ఆ పట్టణంలో ప్రకృతి, ప్రశాంతత, ఆధ్యాత్మిక వాతావరణం రాబర్ట్ను ఎంతగానో ఆకట్టుకున్నాయి. ఈ జంట 2009లో వివాహం చేసుకుని, జపాన్లో స్థిరపడింది. రాబర్ట్ అక్కడ ఓ యూనివర్సిటీలో ఇంగ్లిష్ ప్రొఫెసర్గా చేరాడు. కానీ, విధి ఈ జంటను చిన్నచూపు చూసింది. 2022లో బ్రెయిన్ హెమరేజ్కు గురైన రాబర్ట్.. మృతిచెందాడు.
