రానున్న ఎన్నికల్లో ముమ్మాటికీ బీఆర్ఎస్ దే విజయం

రాష్ట్రంలో జరుగుతున్న రాజకీయ పరిణామాలు, ప్రజాభిప్రాయం, వివిధ సంస్థలు నిర్వహిస్తున్న సర్వేలు అన్నీ బీఆర్ఎస్‌కు అనుకూలంగా ఉన్నాయని ఆయన పేర్కొన్నారు.

కాంగ్రెస్ ప్రభుత్వం అధికారంలోకి వచ్చిన తర్వాత ప్రజల్లో తీవ్ర నిరాశ నెలకొందని, ఎన్నికల ముందు ఇచ్చిన హామీలను అమలు చేయడంలో ప్రభుత్వం పూర్తిగా విఫలమైందని కేటీఆర్ ఆరోపించారు. ఈ కారణంగానే కాంగ్రెస్ పార్టీ రోజురోజుకూ ప్రజాదరణ కోల్పోతోందని, రానున్న ఎన్నికల్లో మూడో స్థానానికి పరిమితం కావడం ఖాయమని అన్నారు.

కాంగ్రెస్ పార్టీ ప్రస్తుతం జారుడు బల్లపై ఉందని, ఒకసారి కిందకు జారడం మొదలైన తర్వాత తిరిగి పైకి రావడం సాధ్యం కాదని వ్యాఖ్యానించారు. రాష్ట్ర ప్రజలు కాంగ్రెస్ పాలనలో ఎదుర్కొంటున్న ఇబ్బందులు, నెరవేరని హామీలు, పెరుగుతున్న అసంతృప్తి కారణంగా ఆ పార్టీపై విశ్వాసం కోల్పోయారని చెప్పారు.

రానున్న ఎన్నికల్లో బీఆర్ఎస్ ఎలాంటి పొత్తులకు వెళ్లదని కేటీఆర్ స్పష్టం చేశారు. తెలంగాణ రాష్ట్రం ఏర్పడిన తర్వాత జరిగిన ప్రతి ఎన్నికలోనూ తమ పార్టీ ఒంటరిగానే పోటీ చేసిందని, అదే సంప్రదాయాన్ని కొనసాగిస్తామని చెప్పారు.

ఒంటరి పోరాటమే తమ బలం అని, ప్రజలు ఎప్పుడూ బీఆర్ఎస్‌ను ఆదరించారని పేర్కొన్నారు. గత ఎన్నికల్లో కూడా స్వల్ప ఓట్ల తేడాతో మాత్రమే అధికారాన్ని కోల్పోయామని, ప్రజలు ఇప్పుడు కాంగ్రెస్ పాలనను చూసిన తర్వాత బీఆర్ఎస్ పాలన విలువను మరింతగా గుర్తిస్తున్నారని అన్నారు.

గత ప్రభుత్వ హయాంలో కొన్ని అంశాల్లో ప్రజలకు అసంతృప్తి ఉన్న విషయాన్ని బీఆర్ఎస్ గుర్తించిందని కేటీఆర్ తెలిపారు. ప్రజలు సూచించిన లోపాలను సరిదిద్దుకునే దిశగా పార్టీ పూర్తిస్థాయిలో ఆత్మపరిశీలన చేసుకుందని చెప్పారు.

పార్టీ అధినాయకత్వం నుంచి గ్రామస్థాయి కార్యకర్త వరకు ప్రతి ఒక్కరూ ఆత్మవిమర్శ చేసుకున్నారని, గతంలో జరిగిన పొరపాట్లు భవిష్యత్తులో పునరావృతం కాకుండా చర్యలు తీసుకుంటున్నామని అన్నారు. ప్రజల ఆకాంక్షలకు అనుగుణంగా మరింత బలమైన రాజకీయ ప్రత్యామ్నాయంగా బీఆర్ఎస్ ముందుకు సాగుతోందని పేర్కొన్నారు.

డీలిమిటేషన్, జమిలి ఎన్నికల అంశాలపై కూడా కేటీఆర్ స్పందించారు. జూలై నెల నుంచి డీలిమిటేషన్ ప్రక్రియ ప్రారంభమయ్యే అవకాశాలు ఉన్నాయని ప్రచారం జరుగుతోందని అన్నారు. ఒకవేళ డీలిమిటేషన్ జరిగితే నియోజకవర్గాల సరిహద్దులు మారే అవకాశం ఉంటుందని, దీంతో ఎవరు ఎక్కడి నుంచి పోటీ చేస్తారన్నది ఇప్పుడే చెప్పలేమని పేర్కొన్నారు.

జాతీయ స్థాయిలో డీలిమిటేషన్ జరగకపోయినా రాష్ట్ర పునర్విభజన చట్టం ప్రకారం తెలంగాణ, ఆంధ్రప్రదేశ్ రాష్ట్రాల్లో జరగాల్సిన పరిస్థితి ఉందని చెప్పారు. కనీసం ఈ రెండు రాష్ట్రాల్లో అయినా డీలిమిటేషన్ జరిగే అవకాశం ఉందని తనకు సమాచారం ఉందన్నారు.

జమిలి ఎన్నికల విషయంలో మాత్రం ఇంకా స్పష్టత లేదని, అవి జరిగే అవకాశాలు తక్కువగా కనిపిస్తున్నాయని వ్యాఖ్యానించారు.

దక్షిణ భారత ప్రాతినిధ్యం తగ్గితే వ్యతిరేకిస్తాం

డీలిమిటేషన్ ప్రక్రియ ద్వారా దక్షిణ భారత రాష్ట్రాలకు లోక్‌సభలో ప్రాతినిధ్యం తగ్గించే ప్రయత్నం జరిగితే బీఆర్ఎస్ తీవ్రంగా వ్యతిరేకిస్తుందని కేటీఆర్ హెచ్చరించారు.ప్రస్తుతం ఉన్న ప్రాతినిధ్యం కొనసాగితే తమకు అభ్యంతరం లేదని, కానీ దక్షిణ భారత రాష్ట్రాల హక్కులు దెబ్బతింటే ప్రజలతో కలిసి ఉద్యమిస్తామని స్పష్టం చేశారు. అలాంటి పరిస్థితి దేశ రాజకీయ స్థిరత్వానికి కూడా ప్రమాదకరంగా మారే అవకాశం ఉందని పేర్కొన్నారు.

ముఖ్యమంత్రి రేవంత్ రెడ్డిపై కేటీఆర్ తీవ్ర విమర్శలు చేశారు. రాష్ట్ర ప్రభుత్వం భారీ స్థాయిలో ప్రభుత్వ భూములను విక్రయిస్తూ వేల కోట్ల రూపాయలు సమీకరిస్తోందని, ఆ నిధులు ఎక్కడ ఖర్చవుతున్నాయో ప్రజలకు చెప్పాలని డిమాండ్ చేశారు. నాలుగు లక్షల కోట్ల రూపాయలకు పైగా అప్పులు తెచ్చి వాటిని ఏ పనులకు వినియోగించారో ప్రభుత్వం శ్వేతపత్రం విడుదల చేయాలని కోరారు.

ఒకవైపు ఫీజు రీయింబర్స్‌మెంట్ వంటి కీలక పథకాలు సక్రమంగా అమలు కావడం లేదని, కొత్త పెన్షన్లు ఇవ్వడం లేదని, ఎన్నికల హామీలు నెరవేర్చడం లేదని ఆరోపించారు. అదే సమయంలో కొత్త హెలికాప్టర్లు కొనుగోలు చేయడం, విలాసవంతమైన ఖర్చులు చేయడం జరుగుతోందని విమర్శించారు.

సుమారు 200 కోట్ల రూపాయల వ్యయంతో సీఎం కోసం రాజప్రాసాదాన్ని నిర్మిస్తున్నారని, భారీ కోటగోడల మధ్య ప్రత్యేక భవనాన్ని నిర్మించారని ఆరోపించారు. ఆ నిర్మాణానికి సంబంధించిన జీవోలను కూడా ప్రభుత్వం రహస్యంగా ఉంచుతోందని చెప్పారు.

నిజంగా ఎలాంటి తప్పు చేయకపోతే ఆ వివరాలను ఎందుకు ప్రజలకు వెల్లడించడం లేదని ప్రశ్నించారు. ముఖ్యమంత్రి నివాస గృహప్రవేశ కార్యక్రమాన్ని కూడా అర్ధరాత్రి వేళ నిర్వహించారని, అందులో రహస్యమేమీ లేకపోతే మీడియాను తీసుకెళ్లి ప్రజలకు చూపించాలని డిమాండ్ చేశారు.

ప్రగతి భవన్‌పై చేసిన ఆరోపణలు గుర్తు చేసుకోవాలి

గతంలో బీఆర్ఎస్ ప్రభుత్వంపై ప్రగతి భవన్‌ను లక్ష్యంగా చేసుకుని బంగారు కిటికీలు, విలాసవంతమైన బాత్రూమ్‌లు అంటూ కాంగ్రెస్ నేతలు విస్తృత ప్రచారం చేశారని కేటీఆర్ గుర్తు చేశారు. ఇప్పుడు అదే నాయకులు అధికారంలోకి వచ్చాక మరింత విలాసవంతమైన భవనాలు నిర్మించుకుంటున్నారని ఆరోపించారు. ముఖ్యమంత్రి ఢిల్లీ పర్యటనల ద్వారా రాష్ట్రానికి ప్రయోజనం చేకూర్చలేకపోయారని, కానీ వ్యక్తిగత భవనాల నిర్మాణంపై మాత్రం ప్రత్యేక దృష్టి పెట్టారని విమర్శించారు.

డిప్యూటీ సీఎం కూడా హైదరాబాద్, ఖమ్మం, మధిర ప్రాంతాల్లో భారీ భవనాలు నిర్మిస్తున్నారని ఆరోపించారు. గత ముఖ్యమంత్రి కేసీఆర్ నిర్మించిన భవనాలు సరిపోవని భావిస్తే సచివాలయం, కమాండ్ కంట్రోల్ సెంటర్ వంటి భవనాలను ఎందుకు ఉపయోగిస్తున్నారని ప్రశ్నించారు.

రాష్ట్రంలో లక్ష కోట్ల రూపాయల విలువైన భూములను విక్రయిస్తున్న ప్రభుత్వం ఆ డబ్బు ఎక్కడ వినియోగిస్తున్నదో ప్రజలకు వివరించాలని కేటీఆర్ డిమాండ్ చేశారు. కాంగ్రెస్ ఎన్నికల సమయంలో ప్రతి కుటుంబానికి రూ.2.5 లక్షలు అందిస్తామని హామీ ఇచ్చిందని గుర్తు చేశారు. ఇప్పటివరకు రాష్ట్రంలో ఒక్క కుటుంబానికైనా ఆ మొత్తం అందిందా అని ప్రశ్నించారు. కొత్త పథకాలు అమలు చేయకపోయినా కనీసం గతంలో ఉన్న సంక్షేమ కార్యక్రమాలను కొనసాగించాలని సూచించారు. ప్రస్తుతం ఉన్న పథకాలను కూడా నిలిపివేసి ప్రజలను ఇబ్బందులకు గురి చేస్తున్నారని ఆరోపించారు.

రాష్ట్ర యువతలో నిరాశ, నిస్పృహలు పెరుగుతున్నాయని కేటీఆర్ అన్నారు. యువత ఆశలు నెరవేరకపోతే తిరుగుబాటు అనివార్యమని గతంలో హెచ్చరించామని గుర్తు చేశారు. ప్రస్తుతం సోషల్ మీడియా వేదికగా వ్యక్తమవుతున్న అసంతృప్తి కూడా అదే పరిస్థితిని సూచిస్తోందన్నారు. "కాక్రోచ్ జనతా పార్టీ" పేరుతో కనిపిస్తున్న ఆన్‌లైన్ స్పందన ప్రజల్లో పెరుగుతున్న అసంతృప్తికి నిదర్శనమని వ్యాఖ్యానించారు. అయితే అది క్షేత్రస్థాయిలో ఎలా రూపాంతరం చెందుతుందో ఇప్పుడే చెప్పలేమన్నారు.

రియల్ ఎస్టేట్ రంగం కాంగ్రెస్ పాలనలో తీవ్ర సంక్షోభాన్ని ఎదుర్కొంటోందని కేటీఆర్ ఆరోపించారు. బీఆర్ఎస్ ప్రభుత్వ హయాంలో ప్రారంభమైన ప్రాజెక్టులు పూర్తై ప్రస్తుతం రిజిస్ట్రేషన్లు జరుగుతున్నాయని చెప్పారు. రేవంత్ రెడ్డి ప్రభుత్వం వచ్చిన తర్వాత కొత్త పెట్టుబడులు, కొత్త ప్రాజెక్టులు గణనీయంగా తగ్గిపోయాయని పేర్కొన్నారు.

రాష్ట్రంలో రియల్ ఎస్టేట్ పరిస్థితి ఎంత దారుణంగా ఉందో ఈ రంగానికి సంబంధించిన వారిని అడిగితే తెలుస్తుందని అన్నారు. ఈ రంగంపై ఆధారపడి జీవిస్తున్న లక్షలాది మంది కార్మికులు, ఇంజినీర్లు, నిర్మాణ రంగ ఉద్యోగులు తీవ్ర ఇబ్బందులు ఎదుర్కొంటున్నారని చెప్పారు. రాబోయే రెండు, మూడు సంవత్సరాల్లో రిజిస్ట్రేషన్ గణాంకాల ద్వారా కాంగ్రెస్ పాలన ప్రభావం మరింత స్పష్టంగా కనిపిస్తుందని పేర్కొన్నారు.

ప్రధానమంత్రి నరేంద్ర మోడీ నాయకత్వంలోని కేంద్ర ప్రభుత్వంపై కూడా కేటీఆర్ విమర్శలు గుప్పించారు. 12 సంవత్సరాల పాలనలో దేశానికి చెప్పుకోదగ్గ అభివృద్ధి జరగలేదని అన్నారు. ప్రతి కుటుంబానికి ఇల్లు, ఇంటింటికీ తాగునీరు, రైతుల ఆదాయం రెట్టింపు, ఐదు ట్రిలియన్ డాలర్ల ఆర్థిక వ్యవస్థ వంటి హామీల్లో కేంద్ర ప్రభుత్వం విఫలమైందని ఆరోపించారు. దేశ ప్రజల సమస్యలను పరిష్కరించడం కంటే మత రాజకీయాలు, విద్వేష రాజకీయాలకే ప్రాధాన్యం ఇచ్చిందని విమర్శించారు. తెలంగాణ రాష్ట్రానికి కూడా కేంద్ర ప్రభుత్వం గణనీయమైన సహాయం చేయలేదని అన్నారు.

తెలంగాణ జలాల కోసం పోరాడింది బీఆర్ఎస్ మాత్రమే

కృష్ణా, గోదావరి జలాల విషయంలో తెలంగాణ హక్కుల కోసం నిరంతరం పోరాడింది బీఆర్ఎస్ మాత్రమేనని కేటీఆర్ పేర్కొన్నారు.గతంలో మహారాష్ట్ర ప్రభుత్వంతో చర్చలు జరిపి తుమ్మిడిహట్టి ప్రాజెక్టు సాధనకు కేసీఆర్ ప్రయత్నించారని గుర్తు చేశారు. అయితే మహారాష్ట్ర ప్రభుత్వం అభ్యంతరాలు వ్యక్తం చేయడంతో ఆ ప్రాజెక్టు ముందుకు సాగలేదని తెలిపారు.

ప్రస్తుతం కూడా పరిస్థితులు మారలేదని తెలిసినా కాంగ్రెస్ ప్రభుత్వం ప్రజలను తప్పుదోవ పట్టించేందుకు రాజకీయ నాటకాలు ఆడుతోందని ఆరోపించారు.కృష్ణా జలాల అంశంలో కేంద్ర ప్రభుత్వ వైఖరిని ప్రశ్నిస్తూ మొదటగా గళమెత్తింది బీఆర్ఎస్‌నేనని అన్నారు. కేసీఆర్ నిర్వహించిన సభ తర్వాతే ప్రభుత్వం కృష్ణా రివర్ మేనేజ్‌మెంట్ బోర్డుకు రాసిన లేఖను వెనక్కి తీసుకుందని గుర్తు చేశారు. తెలంగాణ నీటి హక్కుల పరిరక్షణలో బీఆర్ఎస్ ఎప్పటికీ రాజీపడదని, రాష్ట్ర ప్రయోజనాల కోసం నిరంతరం పోరాటం కొనసాగిస్తామని కేటీఆర్ స్పష్టం చేశారు.

తెలుగు రాష్ట్రాల్లో లోక్‌సభ సీట్లు 42 నుంచి 64కి పెంచాలని ప్రతిపాదన

తెలంగాణలో నాకంటే ఎక్కువ ఆస్తులు ఎవరికీ లేవు : మల్లారెడ్డి

.