పూర్తయిన మరుక్షణమే ఆ ప్రభావం నాలో బయటపడకపోవచ్చు. కానీ కొన్ని రోజుల తర్వాతో, లేదా ఒక వారం రోజులు గడిచాకో నా రోజువారీ ప్రవర్తనలో మార్పులొచ్చేవి. నేను ఇతరులతో మాట్లాడే విధానంలో లేదా నా చుట్టూ ఉన్న పరిస్థితులకు నేను స్పందించే తీరులో ఆ పాత్రల ఛాయలు స్పష్టంగా, నిశ్శబ్దంగా కనిపించడం మొదలయ్యేవి. అప్పుడే నాకు ఒక ముఖ్యమైన పాఠం బోధపడింది.
ఒక పాత్రలోకి పరకాయ ప్రవేశం చేసి జీవించడం ఎంత పెద్ద కళో, ఆ పని పూర్తయ్యాక మన మనసును ఆ పాత్ర భావోద్వేగాల నుంచి విడదీయడం కూడా అంతే ముఖ్యం. తిరిగి మన సొంత వ్యక్తిత్వంలోకి మనసును తీసుకురావడం కూడా అభ్యాసంతో కూడిన కళ అని నేను గ్రహించాను. లేకపోతే ఆ పాత్రల బరువు మనల్ని నిరంతరం నలిపేస్తుంది.
నటిగా నా వృత్తిపరమైన జీవితంలో నేను ఎదుర్కొన్న అతిపెద్ద, క్లిష్టమైన సవాలు ఏమిటంటే... నా వ్యక్తిగత జీవితంలోని భావోద్వేగాలను, వృత్తిపరమైన బాధ్యతలను వేర్వేరుగా ఉంచడం! ఇది వినడానికి చాలా తేలికగా అనిపించవచ్చు, కానీ ఆచరణలో నరకానికి సమానం. నా వ్యక్తిగత జీవితంలో తీవ్రమైన ఒడిదొడుకులు ఎదుర్కొంటూ, మనసు భావోద్వేగాలతో నలిగిపోతూ, హృదయం ఎంతో భారమై నాలో నేను కుమిలిపోతున్న రోజులు ఎన్నో ఉన్నాయి. లోపల ఏదో తెలియని నిరాశ నా మనసును తొలిచేస్తున్న వేళల్లో కూడా... నేను సమయానికి సెట్కి వెళ్లాల్సి వచ్చేది.
ఇక్కడ క్రూరమైన నిజం ఏమిటంటే... నా మనసు పూర్తిగా కుంగిపోయి, ఒంటరిగా కూర్చుని ఏడవాలనిపించే క్షణాల్లోనే నేను పూర్తిస్థాయి కామెడీ సినిమాల షూటింగ్లలో పాల్గొనాల్సి వచ్చింది. నా లోపల కన్నీళ్ల సుడిగాలి తిరుగుతుంటే, గుండె లోతుల్లోంచి దుఃఖం తన్నుకొస్తుంటే, సరిగ్గా కెమెరా ముందుకు వచ్చి ముఖంపై చిరునవ్వులు చిందిస్తూ, పకపకా నవ్వులు పూయిస్తూ ప్రేక్షకులను మైమరపించాల్సి వచ్చేది. ఇది నా జీవితంలో ఒకటో రెండోసార్లు కాదు, అనేక సందర్భాల్లో జరిగింది. బయటి ప్రపంచానికి నవ్వించడం సులభంగానే అనిపిస్తుంది. హృదయాల్లో కొండంత బాధను దాచుకుని, బాహ్య ప్రపంచానికి వినోదాన్ని పంచడం నటీనటుల వృత్తిధర్మమే కావచ్చు..కానీ మానసికంగా అది ఒక మనిషిని పిండి, పిప్పిచేసే అతిపెద్ద అగ్నిపరీక్ష!
నటులుగా మేము నిరంతరం భావోద్వేగాల సముద్రంలో ఈత కొడుతుంటాం. రోజూ రకరకాల సన్నివేశాల ద్వారా మనలోని రకరకాల భావాలను లోతుగా తవ్వి తీస్తూ, వాటిని స్క్రీన్ పై ప్రదర్శిస్తుంటాం. అందుకే మన మానసిక, భావోద్వేగ సమతుల్యతను కాపాడుకోవడం అత్యంత ఆవశ్యకమని నేను గట్టిగా నమ్ముతాను. మన శరీరానికి ఏదైనా గాయమైతే వెంటనే కట్టుకడతాం, మందులు వాడతాం... మరి కంటికి కనిపించకుండా లోపల మనసుకు అయ్యే గాయాలకు, పడే క్షోభకు ఏం చేయాలి?
అందుకే ప్రతి ఒక్కరూ, ముఖ్యంగా నాలాంటి నటీనటులు ధ్యానం, లేదా థెరపీ ... ఇలా తమ మనసుకు ప్రశాంతతనిచ్చే ఏదో ఒక మార్గాన్ని వెతుక్కోవడం చాలా ముఖ్యం. నేను వ్యక్తిగతంగా తరచుగా ధ్యానం చేస్తుంటాను. అది నా మనసులోని అశాంతిని, కలవరాన్ని తొలగించి, నన్ను మళ్లీ అంతర్గతంగా స్థిరపరుస్తుంది. మన భావోద్వేగాలను రీచార్జ్ చేసుకోవడానికి అది ఒక దివ్యౌషధంలా పనిచేస్తుంది. ఇటీవల నేను, షాహిద్ కపూర్, రష్మిక మందన్నలతో కలిసి ‘కాక్టెయిల్ 2’ వంటి భారీ చిత్రంలో నటిస్తున్నప్పుడు కూడా, నా మనశ్శాంతికి ప్రాధాన్యం ఇస్తూనే పనిచేశాను. గ్లామర్ లోకంలో ఎంత ఎత్తుకు ఎదిగినా, ఎన్ని జాతీయ అవార్డులు సాధించినా... రోజు చివరికి మనసు ప్రశాంతంగా లేకపోతే ఆ విజయాలకు, ఆ చప్పట్లకు ఏమాత్రం అర్థం ఉండదు. బాహ్య ప్రపంచాన్ని గెలవడం కాదు, మన అంతరంగాన్ని నిగ్రహించుకుని మనసును కాపాడుకోవడమే నిజమైన విజయమని నేను గ్రహించాను. వెండితెరపై మేం పూయించే నవ్వుల వెనుక ఎవరూ ఊహించని భావోద్వేగాల సుడిగుండాలు ఉంటాయి. కెమెరా ఆఫ్ కాగానే పాత్రల ప్రభావం ముగిసిపోదు. సొంత జీవితంలో గుండె పగిలే బాధ ఉన్నా, స్క్రీన్ మీద నవ్వులు చిందించడం నటులకు ఎదురయ్యే అతిపెద్ద పరీక్ష. నిరంతరం భావోద్వేగాలతో ఆడుకునే మా లాంటి వారికి థెరపీ లేదా ధ్యానం ద్వారా మనశ్శాంతిని కాపాడు కోవడం ఎంతో అవసరం. గ్లామర్ ప్రపంచంలో
