రోజూ 5 కప్పుల కాఫీ.. లివర్ కు మంచిదా

రోజూ 5 కప్పుల కాఫీ తాగడం కాలేయ ఆరోగ్యానికి మేలు చేస్తుందా? ఈ విషయంపై ఆరోగ్య నిపుణులు ఏం చెబుతున్నారో ఇప్పుడు తెలుసుకుందాం.. ఇంటర్నెట్ డెస్క్: కాఫీ కేవలం నిద్ర మత్తు పోగొట్టే పానీయం మాత్రమే కాదు. ఇది కాలేయ ఆరోగ్యాన్ని కూడా కాపాడడంలో సహాయపడుతుందని తాజా పరిశోధన చెబుతోంది. రోజూ కాఫీ తాగే వారికి సిర్రోసిస్, కాలేయ క్యాన్సర్ వంటి తీవ్రమైన కాలేయ వ్యాధుల ప్రమాదం తగ్గే అవకాశం ఉందని అధ్యయనం వెల్లడించింది. అయితే, దీని అర్థం ప్రతి ఒక్కరూ రోజుకు ఐదు కప్పుల కాఫీ తాగడం ప్రారంభించాలని కాదు. కాఫీ తాగేవారిలో కాలేయ ఆరోగ్యం మెరుగ్గా ఉండే అవకాశం ఉందని మాత్రమే ఈ పరిశోధన సూచిస్తోంది. క్లినికల్ గ్యాస్ట్రోఎంటరాలజీ అండ్ హెపటాలజీ జర్నల్‌లో ప్రచురితమైన ఈ అధ్యయనంలో యూకే బయోబ్యాంక్‌కు చెందిన దాదాపు 3.55 లక్షల మంది ఆరోగ్య వివరాలను పదేళ్లకుపైగా పరిశీలించారు. పాల్గొన్న వారి కాఫీ అలవాట్లు, రక్త పరీక్షలు, కాలేయ స్కాన్లు, ఆరోగ్య రికార్డులను విశ్లేషించారు. పరిశోధన ప్రకారం.. కాఫీ ఎక్కువగా తాగేవారిలో కాలేయ సంబంధిత వ్యాధుల ప్రమాదం తక్కువగా కనిపించింది. రోజుకు 5 లేదా అంతకంటే ఎక్కువ కప్పుల కాఫీ తాగేవారిలో సిర్రోసిస్ ప్రమాదం 32% తగ్గింది. కాలేయ క్యాన్సర్ ప్రమాదం 47% తగ్గింది. కాలేయ వ్యాధులతో మరణించే ప్రమాదం 42% తగ్గింది. రోజుకు ఒకటి లేదా రెండు కప్పులు తాగేవారిలో కూడా కొంత ప్రయోజనం కనిపించినప్పటికీ, ఎక్కువ కాఫీ తాగేవారిలో ఫలితాలు మరింత స్పష్టంగా కనిపించాయి. ఈ అధ్యయనంలో మరో ఆసక్తికరమైన విషయం ఏమిటంటే.. సాధారణ కాఫీతో పాటు డీక్యాఫినేటెడ్ కాఫీ తాగిన వారిలో కూడా ఇలాంటి ప్రయోజనాలు కనిపించాయి. దీంతో కాఫీలోని యాంటీఆక్సిడెంట్లు, పాలీఫెనాల్స్ వంటి సహజ సమ్మేళనాలే ప్రధాన పాత్ర పోషిస్తున్నాయని పరిశోధకులు భావిస్తున్నారు. పరిశోధన ప్రకారం.. కాఫీలో ఉండే సహజ సమ్మేళనాలు కాలేయంలో వాపును తగ్గించడంలో సహాయపడతాయి. కణాలను దెబ్బతీసే ఫ్రీ