Telangana Govt Teachers News

ప్రభుత్వ పాఠశాలల్లో పనిచేస్తూ, ఇష్టారాజ్యంగా విధులకు డుమ్మా కొడుతున్న ఉపాధ్యాయులకు తెలంగాణ విద్యాశాఖ గట్టి షాక్ ఇచ్చింది. ముందస్తు అనుమతి లేకుండా బడులకు రాకుండా విద్యార్థుల భవిష్యత్తుతో ఆడుకునే వారిపై ఇకపై ఎలాంటి దయాదాక్షిణ్యాలు చూపకూడదని తేల్చిచెప్పేసింది. ముందస్తు పర్మిషన్ లేకుండా వరుసగా ఏడాది పాటు విధులకు దూరంగా ఉంటే, నిబంధనల ప్రకారం వారిని ఉద్యోగం నుంచి శాశ్వతంగా తొలగిస్తామని స్పష్టం చేసింది. ప్రభుత్వ బడుల్లో విద్యా ప్రమాణాలు పెంచడం, పిల్లలకు క్రమం తప్పకుండా పాఠాలు అందేలా చూడటమే లక్ష్యంగా ఈ నిర్ణయం తీసుకున్నట్లు తెలిపింది. కొత్త మార్గదర్శకాల ప్రకారం.. అనుమతి లేని గైర్హాజరుపై విద్యాశాఖ అధికారులు సీసీఏ రూల్స్ ప్రకారం వెంటనే చర్యలు ప్రారంభించనున్నారు. వరుసగా ఐదేళ్ల పాటు విధులకు హాజరుకాకపోతే సదరు టీచర్ లేదా సిబ్బంది తమ ఉద్యోగానికి స్వచ్ఛందంగా రాజీనామా చేసినట్లుగానే భావిస్తారు. విదేశీ సర్వీసుల్లో ఉంటూ గడువు ముగిసినా తిరిగి రాని వారికి కూడా ఇదే నిబంధన వర్తిస్తుంది. ఇక నుంచి గైర్హాజరైన వారిని గుర్తించిన వెంటనే కాలయాపన చేయకుండా షోకాజ్ నోటీసులు జారీ చేసి, తక్షణమే విచారణ పూర్తి చేయాలని అధికారులకు ఆదేశాలు అందాయి. ఉపాధ్యాయులు బడికి రాకపోయినా పట్టించుకోకుండా ఉదాసీనంగా ఉండే ఉన్నతాధికారులపై కూడా ప్రభుత్వం కంటిన్యూగా కన్నేసింది. డుమ్మా కొట్టే టీచర్ల వివరాలను దాచిపెట్టినా లేదా వారిపై చర్యలు తీసుకోవడంలో జాప్యం చేసినా హెడ్‌మాస్టర్లు, మండల విద్యాధికారులు, జిల్లా విద్యాధికారులపై కూడా కఠిన చర్యలు ఉంటాయని స్కూల్ ఎడ్యుకేషన్ డైరెక్టర్ నవీన్ నికోలస్ హెచ్చరించారు. గైర్హాజరయ్యే వారిపై చర్యలు తీసుకోకుండా అలసత్వం వహిస్తే సదరు అధికారులనే బాధ్యులను చేస్తూ వేటు వేస్తామని స్పష్టం చేశారు. ఈ క్రమంలో ప్రతి జిల్లా విద్యాశాఖ కార్యాలయంలో గైర్హాజరయ్యే టీచర్లు, నాన్ టీచింగ్ సిబ్బంది కోసం ప్రత్యేకంగా ఒక రిజిస్టర్ నిర్వహించనున్నారు. అందులో ఆబ్సెంట్ అయిన వారి వివరాలను ఎప్పటికప్పుడు ఆన్‌లైన్ లేదా ఆఫ్‌లైన్‌లో అప్‌డేట్ చేయాల్సి ఉంటుంది

Good News To Telangana Govt Teachers: తెలంగాణ ప్రభుత్వం కీలక నిర్ణయం తీసుకుంది. ప్రభుత్వ కళాశాలల అధ్యాపకులు, పాఠశాల ఉపాధ్యాయులకు ఊరట కలిగించేలా ప్రభుత్వం ఆదేశాలు ఇచ్చింది. మంత్రివర్గ సమావేశంలో ఉపాధ్యాయులు, లెక్చరర్లకు సంబంధించి ప్రభుత్వం తీసుకున్న నిర్ణయం ఏమిటో తెలుసా? తెలంగాణ ప్రభుత్వం శుభవార్త వినిపించింది. టీచర్లు, ఉపాధ్యాయులకు ఊరట కలిగించేలా ప్రభుత్వం నిర్ణయం తీసుకుంది. సుదూర ప్రాంతాల నుంచి వచ్చే ఉపాధ్యాయులు, అధ్యాపకులకు మధ్యాహ్న భోజనం వడ్డించాలని తెలంగాణ ప్రభుత్వం నిర్ణయించింది. ఈ మేరకు మంత్రివర్గంలో ఆ నిర్ణయానికి ఆమోదం తెలిపింది. పాఠశాలలు, జూనియర్ కళాశాలల్లో విద్యార్థులతో పాటు ఉపాధ్యాయులు, సిబ్బందికి అల్పాహారంతో పాటు మధ్యాహ్న భోజనం అందించాలని మంత్రివర్గ సమావేశంలో తీర్మానం చేశారు. వెంటనే ఈ కార్యక్రమం అమలు చేయాలని నిర్ణయించింది. ప్రభుత్వ పాఠశాలలు, కళాశాలల్లో ఇప్పటికే విద్యార్థులకు మధ్యాహ్న భోజన పథకం అమలు చేస్తున్న విషయం తెలిసిందే. తాజా నిర్ణయంతో విద్యార్థులతో కలిసి ఉపాధ్యాయులు, అధ్యాపకులు భోజనం చేయనున్నారు. ప్రభుత్వం తీసుకున్న ఈ నిర్ణయంతో మధ్యాహ్న భోజనం నాణ్యత పెరిగే అవకాశం ఉంది. ఇన్నాళ్లు విద్యార్థులకు వడ్డిస్తున్న మధ్యాహ్న భోజనం నాణ్యత అనేది పట్టించుకోవడం లేదు. ఇప్పుడు విద్యార్థులతో కలిసి ఉపాధ్యాయులు, లెక్చరర్లు భోజనం చేస్తుండడంతో భోజనం నాణ్యత పెరిగే అవకాశం ఉంది. కొన్ని కీలక అంశాలపై మంత్రివర్గ సమావేశంలో చర్చ జరిగింది. పేపర్‌ లెస్‌గా జరిగిన మంత్రివర్గ సమావేశంలో కొన్ని ముఖ్యమైన నిర్ణయాలు తీసుకున్నారు. మాజీ పోలీస్ అధికారుల భద్రతా తొలగింపు, ఉద్యోగులు, పాలనాపరమైన నిర్ణయాలు మంత్రిమండలి తీసుకుంది