సోషల్ మీడియాలో యాక్టీవ్ గా ఉండేవారికి పొట్టి మామ గురించి తెలిసే ఉంటుంది. సినిమా పాటలకు కవర్ సాంగ్స్ చేస్తూ ఆయన యూట్యూబ్లో మంచి పాపులారిటీ సంపాదించుకున్నారు. ముఖ్యంగా మెగాస్టార్ చిరంజీవి పాటలకు అచ్చుగుద్దినట్టు ఆయన వేసే స్టెప్పులు నెట్టింట తెగ వైరల్ అవుతుంటాయి. చిరుకి వీరాభిమాని అయిన పొట్టి మామ.. ఎప్పటికైనా తన ఫేవరేట్ హీరోని కలవాలని కోరుకున్నారు. ఇన్నాళ్లకు ఆయన కోరిక నెరవేరింది. ఆయన ఇప్పుడు చిరంజీవిని కలిశారు.మెగా హీరో వరుణ్ తేజ్ నటించిన ‘కొరియన్ కనకరాజు’ సినిమాలో పొట్టి మామ నటించారు. మంగళవారం హైదరాబాద్ లో ఈ మూవీ మెగా బ్లాక్బస్టర్ సెలబ్రేషన్స్ ఈవెంట్ జరిగింది. దీనికి చిరంజీవి చీఫ్ గెస్టుగా హాజరయ్యారు. ఈ వేడుకలో పాల్గొన్న పొట్టి మామ.. మెగాస్టార్ ని చూసి బోరున ఏడ్చేశారు. మోకాళ్ల మీద కూర్చొని తన అభిమాన నటుడుకి రెండు చేతులెత్తి నమష్కారం చేశారు. పొట్టి మామ కింద కూర్చోడానికి ప్రయత్నించగా.. చిరు ఆయన్ను ఆప్యాయంగా దగ్గరకు తీసుకొని, ఓదార్చారు. తన పక్కన కూర్చోబెట్టుకుని ఫొటో దిగారు. దీంతో పొట్టిమామ ఎమోషనల్ అయ్యారు.
