ఆచార్య చాణక్యుడి బోధనలు ఇప్పటికీ మనకు ఎంతో ఉపయోగపడతాయి. ఒక వ్యక్తి ప్రశాంతమైన జీవితం గడపాలన్నా, ఎలాంటి ఇబ్బందులు రాకుండా ఉండాలన్నా కొన్ని విషయాలను ఎప్పుడూ రహస్యంగా ఉంచాలని చాణక్యుడు చెప్పారు. ముఖ్యంగా, మన ఆదాయం, బ్యాంకు బ్యాలెన్స్, కుటుంబంలోని సమస్యల గురించి బయట ఎక్కడా మాట్లాడకూడదు. ఎందుకంటే, మన కష్టాన్ని లేదా మంచి సంపాదనను తెలుసుకుని, దాన్ని తమకు అనుకూలంగా మార్చుకోవాలనుకునే వాళ్లు ఈ సమాజంలో చాలామంది ఉంటారని చాణక్యుడు చెప్పాడు. మరి చాణక్యుడి ప్రకారం ఎలాంటి వ్యక్తులతో మన సీక్రెట్స్ పంచుకోకూడదో ఇక్కడ తెలుసుకుందాం.
చాణక్యుడి ప్రకారం మూర్ఖంగా, అమాయకంగా ఉండే వ్యక్తులతో మీ రహస్యాలను పంచుకోవద్దు. మీ కుటుంబ విషయం లేదా సమస్యలను ఒక మూర్ఖుడితో లేదా లోకజ్ఞానం లేని వ్యక్తితో చెప్పడం అంటే, మీ కాలిపై మీరే గొడ్డలి వేటు వేసుకోవడం లాంటిదని చాణక్యుడు చెప్పాడు. ఇలాంటి వాళ్లకు ఎక్కడ ఏది మాట్లాడాలో తెలియదు. మీరు వారిని నమ్మి మీ కష్టాన్ని చెప్పొచ్చు, కానీ వాళ్లు దాన్ని సరదాకోసమో లేదా వేరేవాళ్లతో మాట్లాడేటప్పుడో బయటపెట్టేస్తారు. దీనివల్ల సమాజంలో మీ గౌరవానికి భంగం కలగవచ్చు.
అవసరం ఉన్నప్పుడు మాత్రమే మిమ్మల్ని వెతుక్కుంటూ వచ్చేవారు, ఎప్పటికీ మీ నిజమైన శ్రేయోభిలాషి కాలేరు. ఇలాంటి స్వార్థపరులతో మీ బలహీనతను గానీ, ఆర్థిక కష్టాలను గానీ ఎప్పుడూ చెప్పకూడదని చాణక్య నీతి చెబుతోంది. ఇలాంటి వాళ్లు, తమ పనిని చక్కబెట్టుకోవడానికి మీ నిస్సహాయతను వాడుకుంటారు. అలాగే మీకు నిజంగా ఒక సమస్య వచ్చినప్పుడు, మొదట మిమ్మల్ని వదిలి పారిపోయేది కూడా వీళ్లేనని చాణక్యుడి బోధనలు చెబుతున్నాయి.
కొంతమందికి ఇతరులలో తప్పులు వెతకడం, వాళ్ల వెనుక చాడీలు చెప్పడమే పని. ఇలాంటి వాళ్లకు మీ సమస్యలు, వైఫల్యాలు తెలిస్తే, సహాయం చేయడానికి బదులుగా దాన్ని నలుగురికీ చెప్పి ప్రచారం చేస్తారు. మీ సమస్యలను గోరంతను కొండంత చేసి, మీకు మానసిక ఒత్తిడిని పెంచుతారు. అందుకే, మీ వ్యక్తిగత విషయాలను ఇలాంటి వారికి ఎప్పుడూ చెప్పకూడదని చాణక్య నీతి చెబుతోంది.
మనం అన్ని రహస్యాలను అందరితో చెప్పకూడదని చాణక్య నీతి మనకు నేర్పుతుంది. మీ ఆదాయాన్ని, బలహీనతలను మీరు రహస్యంగా ఉంచినప్పుడు, అనవసరమైన చాలా సమస్యలను నివారించవచ్చు. ఏదైనా బయటకు చెప్పే ముందు బాగా ఆలోచించి, అర్థం చేసుకొని మాట్లాడాలి. మన విషయాలను రహస్యంగా ఉంచుకోవడమే తెలివైన పని, అదే మనల్ని సురక్షితంగా ఉంచుతుందని చాణక్య నీతి సూచిస్తోంది.
