ఫిట్నెస్ ప్రపంచంలో కండరాలు పెరగాలంటే 'అమైనో యాసిడ్ సప్లిమెంట్లు' తప్పనిసరి అనే ఒక పెద్ద అపోహ ఉంది. సాధారణంగా రోజూ సరిపడా ప్రొటీన్ (మాంసకృత్తులు) తీసుకునే ఆరోగ్యవంతులకు ఈ సప్లిమెంట్ల వల్ల పెద్దగా అదనపు ప్రయోజనం ఉండదు. కండరాల పెరుగుదల ప్రధానంగా మూడు అంశాలపై ఆధారపడి ఉంటుంది. క్రమం తప్పకుండా చేసే రెసిస్టెన్స్ ట్రైనింగ్ (వెయిట్ లిఫ్టింగ్/వ్యాయామం), శరీరానికి అవసరమైన మొత్తం ప్రొటీన్ సరిగ్గా అందడం, కండరాలు కోలుకోవడానికి తగినంత విశ్రాంతి, నిద్ర అనే అంశాలపై ఆధారపడి ఉంటుంది. ఈ మూడు సరిగ్గా లేకపోతే ఎలాంటి సప్లిమెంట్లు కూడా ఫలితాన్ని ఇవ్వలేవు. అమైనో యాసిడ్ సప్లిమెంట్స్ vs సహజ ఆహారం.. కండరాల దృఢత్వానికి ఏది మేలు? దీనిపై పూర్తి సమాచారాన్ని మిస్ వీణ వి (చీఫ్ క్లినికల్ డైటీషియన్ & హెచ్ఓడి, ఆస్టర్ వైట్ఫీల్డ్ హాస్పిటల్) అందించారు. ఆ పూర్తి వివరాలేంటో తెలుసుకుందాం.అమైనో ఆమ్లాలు అంటే ఏంటి? ప్రొటీన్ విచ్ఛిన్నమైనప్పుడు ఏర్పడే నిర్మాణ భాగాలే అమైనో ఆమ్లాలు. శరీరానికి 20 రకాల అమైనో ఆమ్లాలు అవసరం కాగా, అందులో 9 'ఎసెన్షియల్ అమైనో ఆమ్లాల్ని' శరీరం సొంతంగా తయారుచేసుకోలేదు. వీటిని మనం రోజూ తినే ఆహారం ద్వారానే పొందాలి. శరీరానికి అవసరమైన మొత్తం 20 అమైనో ఆమ్లాలను ప్రధానంగా మూడు రకాలుగా వర్గీకరిస్తారు. ఎసెన్షియల్ అమైనో ఆమ్లాలు (9): వీటిని శరీరం సొంతంగా తయారుచేసుకోలేదు. ఆహారం ద్వారా మాత్రమే పొందాలి (ల్యూసిన్, ఐసోల్యూసిన్, వాలైన్ వంటివి). నాన్-ఎసెన్షియల్ అమైనో ఆమ్లాలు (11): వీటిని శరీరం అవసరమైనప్పుడు స్వయంగా ఉత్పత్తి చేసుకోగలదు. కండిషనల్ అమైనో ఆమ్లాలు (Conditional Amino Acids): సాధారణ సమయంలో శరీరం తయారుచేసినప్పటికీ, తీవ్రమైన అనారోగ్యం, గాయాలు లేదా అధిక శారీరక ఒత్తిడి ఉన్నప్పుడు ఆహారం ద్వారా అదనంగా అందించాల్సి ఉంటుంది.సహజ ఆహారమే ఎందుకు శ్రేష్టం? గుడ్లు, పాలు-పెరుగు వంటి డెయిరీ ఉత్పత్తులు, చేపలు, చికెన్, సోయా, పప్పులు, బీన్స్, డ్రై ఫ్రూట్స్ వంటి సహజ ఆహారాల్లో కండరాల పునరుత్పత్తికి కావాల్సిన అన్ని ముఖ్యమైన అమైనో ఆమ్లాలు లభిస్తాయి. వీటితో పాటు విటమిన్లు, ఖనిజాలు, ఆరోగ్యకరమైన కొవ్వులు కూడా సమృద్ధిగా అందుతాయి. ఈ పోషకాలు రోగనిరోధక శక్తిని పెంచి శరీర సంపూర్ణ ఆరోగ్యానికి దోహదపడతాయి. వీటిని డబ్బా సప్లిమెంట్లు అందించలేవు.అసలు సప్లిమెంట్లు ఎవరికి అవసరం? తీవ్రమైన స్థాయిలో సాధన చేసే ప్రొఫెషనల్ అథ్లెట్లు ఆకలి మందగించి తగినంత ఆహారం తీసుకోలేని వారు ఆహార లోపాలు ఉన్న వృద్ధులు అనారోగ్యం నుంచి కోలుకుంటున్న రోగులువీరు కూడా వైద్యులు లేదా డైటీషియన్ల పర్యవేక్షణలోనే వీటిని వాడాలి. సరైన సమతుల్య ఆహారం తీసుకోకుండా కేవలం BCAA లేదా అమైనో యాసిడ్ పౌడర్లు తాగడం వల్ల ఎలాంటి ఉపయోగం ఉండదు. సప్లిమెంట్లు ఎప్పుడూ ఆహారానికి ప్రత్యామ్నాయం కావు.BCAA అంటే ఏంటి? దాని చుట్టూ ఉన్న వాస్తవాలు జిమ్ల్లో బ్రాంచ్డ్-చైన్ అమైనో యాసిడ్స్ (BCAAs - ల్యూసిన్, ఐసోల్యూసిన్, వాలైన్) డ్రింక్స్ను విస్తృతంగా ప్రమోట్ చేస్తారు. వాస్తవం: BCAAలలో కేవలం మూడు అమైనో ఆమ్లాలు మాత్రమే ఉంటాయి. కండరాల పెరుగుదల (Muscle Protein Synthesis) జరగాలంటే మొత్తం 9 ఎసెన్షియల్ అమైనో ఆమ్లాలు ఒకేసారి శరీరానికి అందాలి. పరిమితి: గుడ్లు, పాలు, చికెన్ లేదా సోయా తిన్నప్పుడు శరీరానికి ఈ మూడు BCAAలతో పాటు మిగతా అన్ని అమైనో ఆమ్లాలు సహజంగానే లభిస్తాయి. కాబట్టి ప్రొటీన్ సరిగ్గా తీసుకునేవారికి ప్రత్యేకంగా BCAA పౌడర్లు అనవసర ఖర్చు తప్ప పెద్దగా లాభం ఉండదు.సప్లిమెంట్ల వల్ల ఉండే నష్టాలు, జాగ్రత్తలు వైద్యుల సలహా లేకుండా మితిమీరి సప్లిమెంట్లు వాడటం వల్ల కొన్ని సమస్యలు ఎదురవుతాయి. జీర్ణ సమస్యలు: బ్లోటింగ్ (కడుపు ఉబ్బరం), వికారం, అతిసారం వంటి సమస్యలు రావచ్చు. నాణ్యత లోపాలు: మార్కెట్లో ఉండే అన్ని పౌడర్లు ప్రామాణికమైనవి కావు. కొన్నింటిలో మితిమీరిన కృత్రిమ తీపి పదార్థాలు (Artificial Sweeteners), హెవీ మెటల్స్ లేదా ప్రిజర్వేటివ్స్ ఉండే ప్రమాదం ఉంది. * సహజ పోషకాల లోపం: డబ్బా పౌడర్లపైనే పూర్తిగా ఆధారపడితే ఆహారంలో అందే పీచు పదార్థం (Fiber), యాంటీఆక్సిడెంట్లు లోపించి జీర్ణక్రియ మందగిస్తుంది. చివరగా: సాధారణంగా వ్యాయామం చేయని సగటు వ్యక్తికి రోజుకు శరీర బరువులో ప్రతి కేజీకి 0.8 గ్రాముల ప్రొటీన్ సరిపోతుంది. కండర పుష్టి లేదా జిమ్ చేసేవారికి కేజీ బరువుకు 1.4 నుండి 2.0 గ్రాముల వరకు ప్రొటీన్ అవసరం పడుతుంది. ప్రొటీన్ మొత్తాన్ని ఒక్కసారే తీసుకోకుండా, ప్రతి భోజనంలోనూ (బ్రేక్ఫాస్ట్, లంచ్, డిన్నర్) సమంగా విభజించి తీసుకోవడం వల్ల శరీరానికి అమైనో యాసిడ్స్ నిరంతరం అందుతాయి.సమయం తెలుగు సంప్రదించిన వైద్య నిపుణులుశ్రీమతి వీణ వి, చీఫ్ క్లినికల్ డైటీషియన్ & హెచ్ఓడి - క్లినికల్ న్యూట్రిషన్ మరియు డైటెటిక్స్ విభాగం, ఆస్టర్ వైట్ఫీల్డ్ హాస్పిటల్.
